മഴ ഇങ്ങനെ

നീണ്ട വിരലുകളാല്‍ മഴ

എന്നിടനെഞ്ചില്‍ ആഞ്ഞു കുത്തി

ദൂരെ.. ആ വിരലുകള്‍ നീട്ടി

അവന്റെ സ്വപ്നങ്ങളില്‍ മഴ

ആര്‍ദ്രമായ് തഴുകിയിറങ്ങി.

അവളിലെ വിഹ്വലതകളില്‍

പേമാരിയായ് അലറി പെയ്തു,

അപ്പോഴും മുന്‍പെന്ന പോലെ

ഇല ചാര്തുകളില്‍ മഴ

നിര്‍വികാരമായ് തന്നെ പെയ്തുകൊണ്ടിരുന്നു.

നവ വിപ്ലവം

 

ബഹുനില പാര്‍ടി ഓഫീസുകളിലെ

ശീതീകരിച്ച കൊണ്ഫറന്‍സ്-

റൂമുകളിലാണ് വിപ്ലവം

വിലപിടിച്ച വിദേശ കാറുകളിലെ

പതുപതുത്ത-

കുഷ്യന്‍ സീറ്റുകളിലാണ് വിപ്ലവം

സകുടുംബ വിദേശ യാത്രകളില്‍

സുഖ സുന്ദര വിപ്ലവം.

നവ ലിബറലിസ്റ്റ്‌,കൊളോണിയലിസ്ടിക്‌

അമേരിക്കന്‍ ആതുരാലയ-

സുഖ ചികിത്സകളിലാണ് നവ വിപ്ലവം

അമൈസ്മെന്റ്റ്‌പാര്‍ക്കുകളിലെ
നുരകളില്‍ തുടിച്ചുതിമര്‍ക്കും
സുതാര്യതകളിലാണ് വിപ്ലവം.
റിസോര്‍ട്ടുകളില്‍,

ഷോപ്പിംഗ്‌ മാളുകളില്‍,

നഴ്സിംഗ് കോളേജുകളില്‍,

സ്പെഷ്യലിറ്റി ഹോസ്പിറ്റലുകളില്‍

തലയെടുപ്പോടെ,

കോര്‍പ്പറേറ്റ്‌ തലക്കനമോടെ

ഉയര്‍ന്നു പറക്കും

നവ ചെങ്കൊടികളിലാണ് പുതു വിപ്ലവം

ചാനല്‍ സാമ്രജ്യങ്ങളില്‍,

പത്ര നിര്‍മാണ വ്യവസായങ്ങളില്‍

നട്ടു വളര്‍ത്തും

നവയുഗ ബൂര്‍ഷോ-

സംസ്കൃതികളിലാണ് വിപ്ലവം.

വിടുവായന്‍ മണികള്‍ മുഴക്കും

കൊലവെറികളിലാണ് ത്രെസിക്കും വിപ്ലവം

പിന്നെ,

ഇന്നോവകളില്‍ ഓടിവന്നെത്തി

തെരുവുകളില്‍ ഒഴുക്കും
ചുടു രക്ത പുഴകളിലാണ് പുതുവിപ്ലവം.